មន្រ្តីសាលាខណ្ឌចំការមន បានឲ្យដឹងថា ក្នុងនាមអភិបាលខណ្ឌចំការមន លោក ឡូ យុយ តំណាងឲ្យប្រជាពលរដ្ឋ ជាង១៤ ម៉ឺន នាក់ នៅរសៀល ថ្ងៃព្រហស្បតិ៍ទី១៨ ខែតុលា នេះ បានដឹកនាំមន្រ្តីរាជការ ក្រោមឱវាទ រួមទាំងកម្លាំងនគរបាលខណ្ឌ និងមន្រ្តីកងរាជអាវុធហត្ថខណ្ឌ បានអុជធូប គោរពព្រះវិញ្ញាណក្ខន្ធព្រះបរមសព ព្រះករុណា ព្រះមហាវីរក្សត្រ ព្រះករុណា នរោត្តម សីហនុ ។
មន្ត្រីរូបនោះ បានឲ្យដឹងទៀតថា ទាំងលោកអភិបាលខណ្ឌចំការមន ទាំងប្រជាពលរដ្ឋជាង១៤ ម៉ឺន នាក់ក្នុងខណ្ឌ ពិតជាមានក្តីតក់ស្លត់ក្តុកក្តួលរន្ធត់ចិត្ត រកអ្វីមក ប្រៀបផ្ទឹមពុំបាន ដោយព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះអង្គទ្រង់ បានយាងចូលទិវង្គត នេះគឺជាមហាសោកសៅឥតគណនា លោកអភិបាលខណ្ឌចំការមន និងប្រជាពលរដ្ឋជាង១៤ ម៉ឺន នាក់ ក្នុងខណ្ឌ សូមព្រះបរមរាជានុញ្ញាត សូមធ្វើការវន្ទនា ចូលរួមរំលែក នូវព្រះរាជមរណទុក្ខ ដ៏មហាក្រៀមក្រំ រកទីបំផុតគ្មាន និងសូមសម្តែងថ្វាយ នូវសមានទុក្ខ ដ៏មហាជ្រាលជ្រៅ ព្រមទាំងក្តី សង្វេគដ៏ មហាធំធេង និងពោរពេញដោយក្តីសោកស្តាយ ស្រណោះអាឡោះអាល័យជាទីបំផុត ចំពោះអង្គព្រះមហាវីរក្សត្រ ព្រះវររាជបិតា ជាទីគោរពសក្ការៈ ស្មើជីវិតរបស់ជន រួមជាតិខ្មែរ ដែលព្រះអង្គដាក់ព្រះជន្មសង្ខារ លាចាកលោក ចាកពីប្រជានុរាស្រ្តជាកូន ចៅ ចៅទួត ចៅលួតរបស់ព្រះអង្គ ៕
