មហាជន មកពីគ្រប់ទិសទី បន្តអុជធូប ថ្វាយផ្កា ឧទ្ទិសដល់ព្រះវិញ្ញាណក្ខន្ធសម្តេចតា នៅមុខវាំង

ភ្នំពេញ: ចាប់តាំងពីព្រឹកព្រលឹម រហូតដល់ព្រលប់ ថ្ងៃអាទិត្យ ទី២៨ ខែតុលា ឆ្នាំ២០១២ មហាជនមកពីគ្រប់ទិសទី បានបន្តអុជធូប ថ្វាយផ្កា ឧទ្ទិសដល់ព្រះវិញ្ញាណក្ខន្ធសម្តេចតា សម្តេចព្រះមហាវីរក្សត្រ សម្តេចព្រះ នរោត្តម សីហនុ នៅមុខព្រះបរមរាជវាំង។ ក៏ប៉ុន្តែសំឡេងទួញយំសោក ក្នុងពេលគោរពព្រះវិញ្ញាណក្ខន្ធសម្តេចតា នៅមុខវាំង គេកំរនឹងឮ។ តែមហាជន ពោរពេញដោយទឹកមុខក្រៀមក្រំ និងការថ្លែងសារទុក្ខនូវការស្តាយស្រណោះ ដល់ព្រះវីរភាពរបស់ព្រះអង្គ។
ថ្ងៃទី 28 តុលា 2012
ដោយ: លី សិលា
CEN

មហាជន នៅតែបន្តគោរពព្រះវិញ្ញាណក្ខន្ធសម្តេចព្រះមហាវីរក្សត្រ នៅមុខព្រះបរមរាជវាំង នាថ្ងៃអាទិត្យ ទី២៨ ខែតុលា ឆ្នាំ២០១២

នៅថ្ងៃអាទិត្យនេះ ប្រជាពលរដ្ឋរាប់រយពាន់នាក់ បានធ្វើឡើងដំណើរស្កាត់មកពីតាមបណ្តាខេត្តនានា ដោយរួមគ្នា ជួលឡានកូរ៉េកាំមីញ៉ូង ឡានទួរីស ១២ កៅអី ជាដើម ជិះពីស្រុកភូមិ មកកាន់មុខព្រះបរមរាជវាំង ដើម្បីអុជធូប ថ្វាយផ្កាភ្ញី ឧទ្ទិសថ្វាយដល់ព្រះវិញ្ញាណក្ខន្ធ សម្តេចតា។
នៅមុខព្រះបរមរាជវាំង នាព្រឹកនេះ ក្រៅពីរូបថត ព្រះឆាយាលក្ខណ៍របស់សម្តេចតាដ៏ធំ ក៏មានការរៀបចំតាំងនូវរូបថត ព្រះបរមមឈូស នៅខាងឆ្វេងព្រះឆាយាលក្ខណ៍។ រីឯផ្នែកខាងស្តាំ ព្រះឆាយាលក្ខណ៍ ក៏មានការរៀបចំបញ្ចាំងព័ត៌មាននានា ជុំវិញការដង្ហែ និងការគោរពព្រះបរមសពរបស់ព្រះករុណា សម្តេចតា ព្រមទាំងការចាក់ផ្សាយនូវព្រះរាជសកម្មភាពរបស់ព្រះអង្គ ជាដើម។ល។
ទៀនធូប ផ្កាឈូក និងរូបថតរបស់ព្រះសម្តេចតា សម្តេចយាយ និងព្រះមហាក្សត្រ នៅតែបន្តត្រូវបានដាក់លក់ នៅមុខព្រះបរមរាជវាំង។
ដោយឡែកទិដ្ឋភាពនៅមុខវាំងវិញ ក៏មានភាពមមាញឹក ដែលពោរពេញដោយមហាជន ចាស់ក្មេង ប្រុសស្រី នៅតែធ្វើដំណើរជាបន្តបន្ទាប់ ទាំងនៅរស់នៅភ្នំពេញ និងឡើងមកពីតាមបណ្តាខេត្តនានា។
ទិដ្ឋភាពមនុស្សកកកុញនៅមុខព្រះបរមរាជវាំងបែបនេះ បានកើតឡើងយូរថ្ងៃមកហើយ ចាប់តាំងពីពេលទទួលដំណឹងពីការយាងចូលព្រះទិវង្គត កាលពីថ្ងៃទី១៥ ខែតុលា ឆ្នាំ២០១២។
ព្រះបរមសពរបស់ព្រះករុណា សម្តេចតា នឹងត្រូវតម្កល់ក្នុងព្រះបរមរាជវាំង រហូតដល់សប្តាហ៍ទី១ ខែកុម្ភៈ ឆ្នាំ២០១២ ពោលគឺនៅមុខចូលឆ្នាំចិន ទើបត្រូវដង្ហែយកទៅប្រារព្ធពិធីបូជា នៅវាលព្រះមេរុ ដែលស្ថិតនៅខាងជើង ជាប់ព្រះបរមរាជវាំង។
មហាជនមកពីគ្រប់មជ្ឈដ្ឋាន ក៏ត្រូវបានគេអនុញ្ញាតឲ្យចូលគោរពព្រះបរមសពរបស់សម្តេចតា សម្តេចព្រះមហាវីរក្សត្រ ដោយផ្ទាល់នៅមុខព្រះបរមមឈូស ក្នុងប្រាសាទព្រះទិវាវិនិច្ឆ័យ ក្នុងព្រះបរមរាជវាំង ចាប់តាំងពីថ្ងៃទី២៤ ខែតុលា ឆ្នាំ២០១២។ ក៏ប៉ុន្តែមហាជន ត្រូវបានតម្រូវឲ្យដាក់ពាក្យសុំតាមបែបបទត្រឹមត្រូវ ទៅកាន់គណៈកម្មាធិការជាតិរៀបចំព្រះរាជពិធីបុណ្យព្រះបរមសព សម្តេចព្រះមហាវីរក្សត្រ ជាមុន៕