គណបក្សសង្គ្រោះជាតិនៅរសៀលថ្ងៃពុធទី២៦កុម្ភៈនេះ នឹងរៀបចំធ្វើវេទិកាជួបជុំប្រជាពលរដ្ឋនិងសកម្មជនរបស់ខ្លួន ដើម្បីជាការសំណេះសំណាលនិងផ្សព្វផ្សាយពីស្ថានការណ៍ថ្មីៗដែល គណបក្សប្រឆាំងមួយនេះបានបំពេញ។ ការប្រារព្ធធ្វើវេទិកានេះបានធ្វើឡើងមួយថ្ងៃមុនការថ្លែងរបស់លោក នាយករដ្ឋមន្ត្រី ហ៊ុន សែន ទាក់ទងទៅនឹងការប្រើប្រាស់ សិទ្ធិស្មើគ្នាក្នុងការធ្វើបាតុកម្ម។
លោក យ៉ែម បុញ្ញរិទ្ធ អ្នកនាំពាក្យគណបក្សសង្គ្រោះជាតិថ្លែងថា លោក សម រង្ស៊ី និងលោក កឹម សុខា ប្រធាននិងអនុប្រធានគណបក្សសង្គ្រោះជាតិ នឹងទៅចូលរួមទាំងពីនាក់ នៅក្នុងវេទិកានេះ ដែលត្រូវចាប់ផ្តើមនៅម៉ោង ២ រសៀល។ លោកថា ស្ថានភាពមានភាពប្រសើរជាងកាលពីមុនដែលគណបក្សនេះបានលុបចោលការ ជួបប្រជុំម្តងហើយ។
ទាក់ទងទៅនឹងការធ្វើវេទិកាជួបជុំសកម្មជននៅក្នុងស្រុកត្រើយស្លា ខេត្តកណ្តាលនេះ លោកផៃ ប៊ុនឈឿន អភិបាលខេត្តកណ្តាល បានប្រាប់វិទ្យុបារាំងអន្តរជាតិ RFI ថា អាជ្ញាធរខេត្តបានទទួលលិខិតជូនដំណឹងមួយមកសាលាខេត្ត ហើយអាជ្ញាធរមិនមានការហាមឃាត់អ្វីទេ។ ក៏ប៉ុន្តែលោក អភិបាលខេត្ត បានស្នើឲ្យគណបក្សសង្គ្រោះជាតិ រក្សាសណ្តាប់ធ្នាប់នៅក្នុងមូលដ្ឋាន ស្នើឲ្យវាគ្មិន កុំប្រើវោហាស័ព្ទប៉ះពាល់ដល់ស្ថាប័នព្រះមហាក្សត្រ ប៉ះពាល់ដល់រដ្ឋាភិបាល ឬបុគ្គលសាធារណៈ។ ជាមួយគ្នានេះលោក ផៃ ប៊ុនឈឿន ក៏បានប្រាប់ផងដែរថា លោកបានដាក់កំលាំងប៉ូលិស និងប៉េអឹម នៅខាងក្រៅវេទិកា ដើម្បីសហការគ្នាការពារសន្តិសុខ ដោយមិនអនុញ្ញាតឲ្យមានការហែក្បួនឡើយ ។
កាលពីថ្ងៃអង្គារទី២៥កុម្ភៈម្សិលមិញ នៅក្នុងពិធីសម្ពោធរោងចក្រអគ្គិសនីដើរដោយធ្យូងថ្ម ពីខេត្តព្រះសីហនុ លោកនាយករដ្ឋមន្ត្រី ហ៊ុន សែន បានថ្លែងត្រង់ៗថា បាតុកម្មពេលនេះមានពីរបើអ្នកប្រឆាំង មានសិទ្ធិជួបជុំ អ្នកគាំទ្រក៏មានសិទ្ធិជួបជុំដូចគ្នាដែរ។ នៅក្នុងន័យនេះ ត្រូវគេមើលឃើញថា លោកនាយករដ្ឋមន្ត្រីចង់មានប្រសាសន៍ពីការអនុញ្ញាត និងមិនអនុញ្ញាតឲ្យធ្វើបាតុកម្ម ដូចៗគ្នា ក្នុងពេលជាមួយគ្នា ដោយណែនាំឲ្យអាជ្ញាធរត្រៀមបែងចែកកន្លែងធ្វើបាតុកម្មជាពីរ។
ក៏ប៉ុន្តែ សម្រាប់វេទិកាគណបក្សប្រឆាំងនៅខេត្តកណ្តាលនាពេលនេះ គេនៅមិនទាន់ឃើញ
មានគណបក្សណាផ្សេង រួមទាំងគណបក្សប្រជាជនកម្ពុជាផង បានស្នើសុំធ្វើការជួបជុំដូចគ្នា
នៅទីកន្លែងតែមួយនៅឡើយ, នេះបើតាមលោក ផៃ ប៊ុនឈឿន អភិបាលខេត្តកណ្តាល។
តំណាងអាជ្ញាធរដែនដីរូបនេះអះអាងថា លោកនឹងមានការសម្របសម្រួលរវាងគណបក្សនានា ប្រសិនបើមានការស្នើសុំ ធ្វើការជួបជុំ ចំពេលម៉ោងដូចគ្នា ដើម្បីបញ្ចៀសការប៉ះទង្គិចគ្នា។
សូមបញ្ជាក់ថា វេទិកាជួបប្រជុំជាមួយអ្នកគាំទ្រគណបក្សសង្គ្រោះជាតិនាពេលនេះ គឺបានធ្វើឡើងជាលើកទីពីរ បន្ទាប់ពីការរំសាយកម្មវិធីដូចគ្នានេះចោល កាលពីសប្តាហ៍មុននៅស្រុកស្អាង ខេត្តកណ្តាលដដែលនេះ។
ប្រភពពី វិទ្យុបារាំងអន្តរជាតិ
